05
11.2018

​【職場心理學】面對惡頂阿頭仲有咩動力返工?係愛呀?定係熱誠呀?

文化政經  

一世人流流長,梗會返過幾份工嘅。有一定年資嘅打工仔係轉唔同工作時,少不免都會將新嘅老細同以前嘅上司比較,睇下對方算係好嘅阿頭定係差嘅。筆者都聽過有啲同事以前返過嗰幾份工都好好彩咁遇到一啲好嘅老細,但如果各位打工仔無咁好彩,遇到一啲唔掂嘅上司就真係要自求多福啦。

筆者近排就同一位朋友食飯,聽佢呻佢個阿頭有幾無能。「老細做錯晒啲嘢要我執手尾不特止,仲會話翻我做嘅嘢唔啱喎。」聽到朋友咁講,都攪到筆者諗翻以前返過一份工嘅辛酸史。筆者以前嗰位阿頭做嘢嗰陣時,工作要求成日轉嚟轉去,返工塞嘢俾人做嗰陣時又無禮貌。每次諗翻起嗰陣時,筆者都好出奇自己嗰陣時究竟係點樣挨過去嘅呢?係愛呀?定係真誠呀?

係錢呀!
無錯,錢的確係職場裡面嘅主要推動力,會令人面對著啲冒犯自己嘅上司時候,都仲會想要頂硬上撐落去嘅。不過物質世界嘅嘢,就唔一定係咁表面嘅。錢除咗係萬能同萬惡之外,仲可以為自己同家庭帶來保障嘅。而依種家庭上嘅保障就係令人頂硬上嘅一個重要要素啦。

職場心理學家Hussain Tariq係2018年所做嘅研究發現,除咗一啲對工作嘅內在動機(intrinsic motivation),即係對工作嘅興趣、抱負同熱誠之外,面對著上司嘅冒犯行為時候仲有一個極其重要嘅要素令打工仔沉默撐下去,保持應有嘅工作表現架喎。嗰樣就係來自保障家庭經濟狀況嘅推動力。而相比起對工作嘅熱情,依種來自家庭經濟壓力嘅推動力更為重要架。Tariq係佢嘅研究指出當一個人對佢份工唔太大興趣,缺乏咗嗰啲內在動機底下,來自家庭嘅推動力就變成唯一維持工作嘅推動力。當面對著惡頂嘅上司嘅時候,各位顧家嘅打工仔會因為要睇住頭家而甘願為半斗米而拆腰,繼續返工。所以Tariq亦係佢嘅研究裡面指出,依種為咗保持家庭經濟收入來源嘅需要甚至會減低員工嘅流失率添架。

聽落好似就係講緊所謂打工仔嘅「奴性」呀啊?但係其實諗深一層,依個都係個人對家庭嘅承諾。會因為依種推動力而係惡頂上司面前跪低嘅人都係為咗一份責任感嘅姐。覺得依家返緊嗰份工好難啃嘅打工仔們,不妨諗翻自己份工對照顧家庭嚟講係咪好重要啦,等自己搵翻啲推動力挨到搵到下一份工嗰陣時呀嘛。記著,係惡頂嘅上司底下,驅使到人返工嘅,唔一定係熱誠,不過就一定係愛,係對屋企人嘅愛呀!

文:特雷弗
啱啱入職夠一年嘅小薯。讀嘅係心理學,做嘅又係心理學嘅嘢,志願係唔再做心理學嘅嘢。

參考來源:Tariq, H., & Ding, D. (2018). Why am I still doing this job? the examination of family motivation on employees' work behaviors under abusive supervision. Personnel Review, 47(2), 378-402. 

更多打工仔分享,追蹤 ECjobsonline 專頁或 瀏覽 www.ecjobsonline.com

發表於2018.11.05
留言(0)
博客名稱 :
ECjobsonline.com 搵工易
網誌名稱:
ECjobsonline 搵工易
使用天數:1,526
年齡:4
按月份瀏覽
    2019
  • 一月
  • 二月
  • 三月
  • 四月
  • 五月
  • 六月
    2018
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 攝影寫真
  • 戀愛心情
  • 文化政經
  • 其他
  • 財經生活
  • 台灣館
自行分類