31
08.2018

【感動時刻】廸士尼畢業慶典

親子育兒(旅遊)  

小朋友成長中有唔同階段,晴晴即將升上小一,要同幼稚園階段講拜拜喇!嚟到一個階段嘅尾聲,梗係要好好慶祝一番啦!經常見到朋友仔響廸士尼影畢業相,既羨慕又葡萄!因為晴晴嘅學校未試過亦都相信唔會用呢種方式慶祝。好啦!一於連同其他媽媽組成一隊畢業生,一齊向廸士尼出發囉!

晨早起床清新開朗!天氣咁好,為我哋嘅畢業禮展開咗美好嘅開始!Gogogo~


嚟到廸士尼門外嘅噴水池,個個畢業生都換上畢業袍,精神奕奕,個look係唔係好醒目呢?


畢業袍係特別為襯米奇而自己在外訂購嘅!米奇會著上紫色袍,我哋呢套畢業袍一定好襯米奇啫!小朋友們~ Are you Ready??


離集合時間仲有少少空檔,每個畢業生都同家人影番張先~


夠鐘喇!埋位!一個跟一個排好隊,心情越嚟越興奮喇!


見到佢哋穿上畢業袍嘅背影,有啲概嘆時間過得太快!由細睇到大,咁快就個個都畢業喇!


晴晴興奮嘅心情表露無遺,預備入去見米奇囉!


唔怪得之前好似差咁啲嘢咁啦!原來就係差咁頂畢業帽,戴上米奇畢業帽嘅小朋友係咪更加精靈呢?


嘩!米奇終於出場喇!小朋友們都好興奮呀!Wow~ ho~~


Hello! Mickey!!! 成班小朋友都進入咗瘋癲狀態,米奇嘅威力真係唔講得笑~ XD


呢個時候,米奇先同前一班畢業生影合照,好緊張,好快就到我哋喇!


工作人員悉心為畢業生排位,我哋咁少人,好快就搞掂啦!hehee~


預備好未?成個畢業典禮嘅戲玉嚟喇!Cheers!!! 米奇同我哋一齊共渡人生嘅重要時刻,好感動呀!家長們都不停舉機拍低呢個珍貴嘅moment,既興奮又難忘~


接住落嚟就同其他卡通人物影合照喇!每次畢業慶典都會有唔同卡通人物,今日就安排咗高飛同我哋影。著上畢業袍嘅高飛,都係第一次見咋!正經咗好多咁喎!XD


終於到同家人合照嘅環節喇!畢業喎!梗係要全家人嚟支持同見證啦!


攞埋證書,畢業禮就圓滿結束!之後就係晴朗都期待嘅暢遊廸士尼樂園時間囉!Wow~ hoo~~


先嚟一個緊張嘅Iron Man英雄冒險之旅~


跟住嚟一場超刺激嘅星戰極速穿梭,不過只限朗朗同爸爸體驗,因為我同晴晴都冇咁嘅膽量呀!在外嘆爆谷等待都夠開心喇!XD


等待期間,近距離見到三位星戰人物,好真實呀!個個都手握武器,小心小心!@.@


晴晴真係未驚過,仲好似見到偶像咁嘅樣,好搞笑呀!XD


朗朗玩完極速之後,好似呆呆哋,唔通飛得太過激?XD 嚟番個輕鬆啲嘅小小世界啦!


呢個真係由細玩到大喇!聽住美妙嘅音樂,坐住船仔欣賞唔同裝飾,心情好舒暢!最緊要係有冷氣嘛!好梳乎呢~


雖然睇過好多次,但唔知點解睇極都唔悶,每個裝飾都設計得咁靚,好吸睛,我都樂在其中呀!


天氣咁曬,解解渴,稍作休息,又繼續我哋嘅奇妙之旅喇!


夢想花園開咗一段時間,不過我哋都係第一次嚟咋!每個機關都吸引到晴朗摸下、撳下,美女與野獸跳舞果個裝置整得好靚,而瀑布下嘅城堡效果都好奇幻呀!


去到反斗奇兵大本營咁啱遇上士兵哥哥搵小朋友玩遊戲,做士兵好講服從性加嘛!要跟住佢哋嘅指示去做,個個小朋友又跟到喎!士兵哥哥好盞鬼,晴晴都玩得好投入呀!


玩咗半日,係時候要開餐醫下個打晒鼓嘅小肚子喇!


咦!點解又穿起畢業袍嘅?兩隻老鼠仔畢業生睇梗咩呀?


原來米奇同米妮咁啱經過,唔怪之得啦!Hi~hi~~


佢哋都係晴晴嘅同校同學仔嚟呀!大家可以一嘗廸士尼畢業癮,心情梗開心啦!影多幾張合照先得!


節目好緊湊!晴晴準備代表畢業生去做巡遊領航大使喇!米奇手已準備好!cute~ ^^


其他學校嘅領航大使都到齊!準備出巡囉!Ready~ go~~


呢部就係我哋嘅坐駕喇!好有懷舊風味,快啲上去坐囉!~


晴晴全程都好享受同遊客揮手,搵佢做代表就啱晒啦!^^


巡遊完結後,我哋就搭火車去同番朗朗同爸爸會合喇!


跟住當然係繼續玩啦!玩番轉迷離大宅先~ 仲記得晴晴細個嘅時候玩呢個驚到攬實爸爸,其實而家玩佢都仲驚驚哋架!不過就冇攬得咁實,大個咗膽量都大番dd喇!~.~


甜品時間!sweet~


最後玩埋森林河流之旅,就差唔多要歸家喇!


臨走就梗係唔會忘記買玩具啦!食飽、玩飽仲有禮物帶番屋企,有人勁滿足囉!


夕陽無限好,只是近黃昏。習慣早睡嘅晴朗都唔會玩得太夜,係時候要返歸囉!豐富奇妙的一天,完~

畢業禮最值錢嘅當然係畢業相啦!畢業禮只包一張大合照,睇完官方影嘅其他相片,一定會忍唔住購買,又唔見錢....


個個企定定,正正經經嘅樣子,好合作!影得唔錯喎!


高飛果張都好好!兩幅都有佢哋簽名添喎!哈哈!


購買相片會贈送埋相架,而相架上嘅磁石貼可以隨意搬去唔同位置,就等小朋友自己做設計啦!


主辦機構仲會額外有一個木框相架,都幾靚喎!將佢擺放響屋企當眼位置先得!^^

畢業禮係三月果陣架喇!晴晴嘅幼稚園生活啱啱完結,令我好想重溫一下佢響廸士尼嘅畢業片段,所以又寫一寫。點解會揀三月?因為春夏季太多雨,怕撞正雨天囉!去廸士尼有好天氣好緊要,尤其係畢業禮咁難得嘅時刻,梗係要天時地利人和都安排得好好啦!畢業禮包咗米奇畢業帽、畢業證書、8R畢業相片、入場券同畢業襟章,件靚靚畢業袍係響偉大嘅淘寶訂購架!有興趣嘅可以參考一下最下嘅資料。其實廸士尼畢業慶典只接受學校或教育機構申請,但由於我哋真係超級想行廸士尼畢業禮,所以就試試以社團名義去申請囉!我哋個媽媽會之前為咗申請一啲活動方便啲,就去申請成為社團,今次大派用場喇!經過同廸士尼洽詢過後,最終獲批准!真係好開心呀!晴晴能夠擁有在廸士尼畢業嘅難忘回憶,第時大個睇番啲相一定好回味啫!一班小朋友好快就升上小一,準備踏入人生另一階段。希望大家都能夠好快適應小一生活,繼續愉快學習,輕鬆面對每一天!


收費價目:
畢業生門票 - $380
小童(非畢業生)持有「奇妙處處通」會員卡(3-11歲) - $210
成人持有「奇妙處處通」會員卡(12-64歲) - $295
1日標準門票優惠(12-64歲) - $495
小童1日門票(3-11歲) - $419
長者1日門票(65歲或以上) - $100
三歲以下幼兒 - 免費

有啲媽媽或者會問,已經有廸士尼年咭,點解仲要付費呀?年咭係for樂園開放時間內入園,而廸士尼畢業禮係響樂園開放時間之前進行,所以如果想見證到小朋友同米奇或其他卡通人物影合照嘅一刻,就需要付費喇!差唔多三百蚊嘅價錢值唔值就見仁見智啦!雖然影合照嘅過程可能講梗係短短半個鐘嘅時間,但能夠見證到最感動時刻,呢啲錢應該都唔慳得!^^

自訂款式畢業袍訂製淘寶連結:
https://item.taobao.com/item.htm?spm=a1z09.2.0.0.4e352e8d24lQbI&id=36354865926

社團註冊申請:
https://www.police.gov.hk/ppp_tc/11_useful_info/licences/societies.html


廸士尼畢業慶典
查詢電話:35503678
詳情:https://www.hongkongdisneyland.com/zh-hk/disney-youth-programs/#/drawer=drawerKey2

※ 以上價錢以廸士尼最新價目表為準。


FIND US on:
       

BLOGs:

 

CONTACT US:

發表於2018.8.31
留言(0)
博客名稱 :
晴朗媽媽
網誌名稱:
晴朗天 - 食·玩·育·美·愛の親子平台
使用天數:913
年齡:2
電郵:chinglongtin@gmail.com
按月份瀏覽
    2018
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 生活品味
  • 電影戲劇
  • 攝影寫真
  • 其他
  • 財經生活