07
10.2017

【新鮮好味】鮮Xin亞洲火鍋@澳門喜來登酒店

環球旅遊(澳門)  

講到澳門有咩嘢好食,大家可能會答我自助餐,或者係葡國菜? No no no... 我哋今次想同大家介紹嘅係打邊爐呀!唔試過都唔知原來澳門呢邊嘅火鍋餐廳做得咁出色。唔信?跟貼啲,跟住我哋嚟啦!
「鮮Xin」位於澳門喜來登酒店,淨係睇門面已經覺得好有氣派喇! 


餐廳好大,座位闊落,環境十分舒適~

晚上七點嚟到已經座無虛席,餐廳有咁多捧場客,一定有佢嘅吸引之處嘅!


入座後店員詢問要邊款湯底,本應一人一鍋,可以叫四鍋。但其實兩大兩細,我哋覺得兩鍋都足夠。結果叫咗一個沙參肉竹鴨腳湯底,清清哋啱小朋友口味。而另一個係肉骨茶,朋友同我都勁like呀!

其他仲有頂上清湯、麻辣湯底、叻沙湯底、五指毛桃椰子唐排湯底同埋胡椒豬肉湯底,部份湯底都好特別喎!

點好湯底之後就要揀打邊爐食材喇!馬上出去自助區睇下有咩嘢好食先~


海鮮有聖子、扇貝、翡翠螺、青口、蜆同蝦~


來自荷蘭嘅豬肉、美國嘅肥牛同紐西蘭嘅羊肉,都係即場由師傅切簿片㗎!


多款丸類,豆腐、雲吞、蝦滑、豬肉滑,全部都可以任攞㗎!*o*

每次都係咁,一見到美食就雙眼發光喇!XD


粉麵都有好多選擇,包保客人食到飽一飽~


其他嘅火鍋配料有鯇魚、雞肉、牛肚等等。仲有我至愛嘅鮮支竹同魚腐呀!


鮮雞蛋都有!亦有切好晒嘅蔬菜排列得整整齊齊,任你揀!


其他蔬菜就有菠菜、唐生菜、娃娃菜...


小白菜同通心菜~


勁多秘製醬汁,啱晒唔同人口味呀!


大家鍾意加啲咩落豉油度呢?我就最愛加蒜蓉同指天椒喇!

講完生嘢,不如講啲熟嘅食物啦!


前菜有馬鈴薯沙律、菌菇沙律、涼伴青瓜木耳...等等


而主菜就有多款熱盤供應~


每道菜都好吸引,而我最欣賞嘅係子薑炒肉片呀!


游完水個肚就特別餓,我哋預備啟動喇!Wow~ ho~~


先試試呢杯名為「紫紅莫都」嘅特飲先!用酸梅、薄荷汁同梳打水調製而成,幾開胃同清涼解渴,簡直係消暑之選呀!


食材新鮮,梗係每款都要試啲啦!


當中食得最多嘅係蝦滑同肥牛,放落兩鍋唔同嘅秘製湯底,煮出嚟味道特別鮮甜味美~


攞咗多款醬汁,酸、甜、辣都有齊,我覺得最特別嘅係麵豉芥末醬(上)、薑豉油(左下)同韓國柚子汁(右下)。將鮮肉點落唔同味嘅汁料就會食出唔同滋味喇!


有咁多選擇,又可以試晒唔同味道,梗僽開心啦!

食到飽飽哋,係時候要食番啲甜嘢喇!向甜品區進發囉~~ *o*


澳門又點會冇葡撻呀?


仲有各式各樣嘅糕點~


麻糬都有兩款~

umm... 甜品區實在係太誘惑,減肥計劃唯有暫時擱置吧!XD


蛋糕、啫喱、奶凍、布甸、芒果黑糯米...

款款賣相都咁精緻,好想試晒佢哋呀!^o^


仲有新鮮水果幫助消滯,好圓滿!


小朋友今餐食得特別快。梗係啦!講好咗食飽先可以出去攞甜品嘛!心情係幾咁期待同興奮呢?^o^


飲品方面,我哋仲叫多咗杯「想入菲菲」,係由菠蘿汁、梳打水、薑蓉同薑水調製而成。酸酸甜甜,一向鍾意飲菠蘿汁又愛薑味,實在係啱晒我口味呀!


小朋友就嘆甜品,而大人就繼續戰鬥到最後一刻喇!Keep fighting~


我哋繼續出去攞唔同醬汁同食材試試,繼續努力!務求要試勻晒所有嘢為止~ XD


適逢中秋將至,餐廳正售賣自家品牌月餅。在月亮、兔仔佈置嘅襯托之下,突然感到節日氣氛好濃厚呀!

響香港打邊爐就打得多喇!嚟到澳門打邊爐都係第一次,感覺上澳門嘅有質素得多。「鮮」名乎其實,食物都係好新鮮。店員服務好好,每次過嚟都好有禮貌,亦會細心留意到我哋嘅需要,好體貼啊!我哋覺得呢度無論環境、食物以至服務都有質素同水準,雖然weekend dinner價錢略貴,但都覺得值得試,淨係海鮮新鮮同多種類都值回票價啦!其實過澳門試下其他餐廳菜式都唔錯丫!可能仲會帶來更多驚喜添!有興趣去嘅朋友記得留肚食甜品,有幾款我哋encore咗多次呀!食到差唔多十點,每款試少少,已經飽到郁唔到喇!如果冬天嚟食應該仲有氣氛,一於遲啲帶埋晴朗爸爸同朗朗,一家人再來嘆多次打邊爐囉!


Xin亞洲火鍋
Lunch Buffet (11:30 ~ 15:00)
成人每位澳門幣$245;小童每位澳門幣$100
Dinner Buffet (18:00 ~ 23:00)
星期日至星期四:成人每位澳門幣$398;小童每位澳門幣$200
星期五及星期六:成人每位澳門幣$438;小童每位澳門幣$200

(餐廳收取加一服務費,SPG俱樂部會員享有特別折扣優惠)

地址:路氹城望德聖母灣大馬路金沙城中心喜来登酒店地面娱樂場樓層
電話:(853) 8113 1200

網址:http://www.xinmacao.com
facebook:https://www.facebook.com/macaoxin


FIND US on:
     

BLOGs:

CONTACT US:

發表於2017.10.07
留言(0)
博客名稱 :
晴朗媽媽
網誌名稱:
晴朗天 - 食·玩·育·美·愛の親子平台
使用天數:518
年齡:1
電郵:chinglongtin@gmail.com
按月份瀏覽
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
    2016
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 生活品味
  • 電影戲劇
  • 攝影寫真
  • 其他
  • 財經生活