01
09.2017

【東京台場】交通景點總攻略

環球旅遊(日韓)   親子育兒   生活品味  

想安排台場一日遊、半日遊但唔知道應該點安排行程、點去台場?台場海濱公園、AQUA CITY、維納斯outlet、大江戶溫泉物語⋯呢啲景點你又識晒未?就等呢篇攻略為你一次過解答台場交通、景點,再教埋你點用百合海鷗一日券慳住玩台場!

圖片來源|Shutterstock

#台場簡介

台場係「御台場」嘅簡稱,係一座填海得嚟嘅巨型人工島,因為位於濱海地區,所以擁有極靚嘅東京灣景色、浪漫嘅彩虹大橋,成為咗好多日劇嘅拍攝場地。再加上豐富嘅購物商城令人買唔停手,唔單止成為咗觀光客最鐘意去嘅地方之一,亦都係東京情侶們嘅熱門約會地點~另外,每年年底台場都會舉辦冬季花火大會,吸引大批人潮去睇。

#台場交通

【百合海鷗線】

圖片來源|Fotolia

如果係由東京市區去台場,多數人會揀搭百合海鷗線(ゆりかもめ),搭乘地點可以揀「新橋站」或者「汐留站」,搭呢班無人鴐駛電車就可以行勻晒台場所有景點,仲可以一覽東京灣嘅絕佳景色~

▶︎路線:新橋→汐留→竹芝→日之出→芝浦碼頭→台場海濱公園→台場→船舶科學館→電信中心→青海→國際展示場正門→有明→有明網球森林公園→市場前→新豐洲→豐洲
▶︎常用站點:新橋、汐留、台場海濱公園、台場、豐洲

【水上巴士】

圖片來源|Fotolia

如果你想朝早去淺草寺,或者完咗台場行程之後想去淺草寺附近,咁就可以揀搭水上巴士~『水上巴士淺草・台場直通線』可以直通台場海濱公園(會喺「日之出棧橋」停一停之後先繼續開~)。

水上巴士有分兩種類型,一種係HOTALUNA(ホタルナ),另一種係HIMIKO(ヒミコ),價錢一樣,小編建議可以搭HOTALUNA,因為HOTALUNA有觀光甲板可以欣賞沿途嘅風景~

▶︎價錢:1560日圓
▶︎點去淺草搭乘處?
都營地鐵、東京metro『淺草站』4號出口,見到紅色吾棲橋嘅對面就會見到水上巴士嘅售票處。
▶︎點去台場搭乘處?
百合海鷗線『台場海濱公園』站或者『台場站』,喺AQUA CITY前就會見到水上巴士嘅售票處。
▶︎水上巴士官網

【都營巴士、Rainbow Bus、 Km Flower Bus】

圖片來源

巴士嘅選擇有台場Rainbow Bus Km Flower Bus 都營巴士三種,巴士嘅好處係可以直達,車費亦唔貴,係慳車錢嘅好選擇!當中台場Rainbow Bus一日券只係500日圓;而Km Flower Bus嘅車費都只係200日圓,超級化算!都營巴士都有推出由門前仲町巴士總站出發去台場嘅路線,可以喺車入面購買一日乘車券(一樣係500日圓)。

▶︎小編提醒:台場Rainbow Bus、 Km Flower Bus都唔可以用Suica、Pasmo卡,搭Km Flower Bus嘅時候亦都建議大家準備好散紙,因為呢班巴士多數係冇得找續㗎!
▶︎都營巴士搭乘處:『門前仲町』站搭海01(5番)去台場海濱公園(約10分鐘一班)
▶︎台場Rainbow bus搭乘處:品川駅港南口(東口)
▶︎Km Flower Bus搭乘處:JR浜松町站前面

另外,小編比多個Tips大家,臨海副都心亦有推出免費循環巴士(Bay Shuttle),台場入面11個主要觀光景點都有停㗎!每20分一班,行一圈大約40分鐘,詳細時間表可以上官網睇睇!

▶︎停靠重要站點:日本科學未來館、維納斯城堡、東京電訊港站、台場購物廣場、AQUA CITY台場、富士電視台、東京台場日航大酒店、青海臨時停車場
▶︎營運時間:11:00~20:00
▶︎免費循環巴士詳細路線圖
▶︎時間表查詢

#台場景點

【彩虹大橋】

圖片來源|Shutterstock

橫跨東京灣、連接住芝浦同台場嘅彩虹大橋,到咗夜晚就會換上夢幻嘅燈光,而喺每年年尾嘅時候更加會陪住東京人一齊渡過跨年嘅時光。彩虹大橋分為上下兩層,上層係收費嘅首都高速公路,下層係可免費通行嘅一般車道同行人步道,係東京情侶非常鐘意去嘅景點之一!

▶︎最佳欣賞點:喺連接海濱公園、日航飯店同AQUA CITY嘅棧橋上面就可以欣賞到彩虹大橋嘅面貌~喺呢度亦都睇得到東京鐵塔,彩虹大橋同自由女神像合稱『台場三景』。
▶︎交通:百合海鷗線「台場」、「台場海濱公園站」

【富士電視台】

圖片來源|Shutterstock

由遠處就可以望到富士電視台嘅標志性建築,巨大嘅銀色大圓球連接喺方形建築物上面,係著名嘅球體展望室。雖然富士電視台係辦公大樓,但一樓、五樓、七樓同二十五樓都可以畀一般民眾參觀。小編最推薦七樓同二十五樓,唔單止有賣好多限定商品,例如係海賊王、暗殺教室嘅精品等等,喺嗰度望出去嘅景色更加係令人讚嘆不絕!

▶︎地址:日本〒135-0091 Tōkyō-to, Minato-ku, Daiba, 2 Chome−4−8(座標:35.626619, 139.774040)
▶︎小編提醒:25樓會好大風,冬天去嘅話可以加多件外套。
▶︎開放時間:10:00~20:00(售票至19:00) ,週一休息(遇到國定假日會順延)
▶︎球體展望室售票:500日圓。
▶︎交通:百合海鷗線「台場站」

【AQUA CITY 、Diver City、Decks】

圖片來源|Shutterstock

富士電視台、AQUA CITY 、Diver City、Decks呢四座建築物離得好近,建議可以一齊行,呢幾個地方要行成日都唔係問題!AQUA CITY係集合咗50間餐廳、70家商店嘅大型購物中心,主要嘅購物熱點集中喺3、4樓。行完AQUA CITY亦可以行聯通橋去Diver City繼續買買買,兩棟都以歐美品牌居多。

而Decks則結合咗Island Mall、JOYPOLIS、Sea Side Mall三大購物中心,發展出好多特色嘅主題購物商店,好似係台場一丁目商店街(4樓)就將昭和年代嘅東京街頭再現,淨係用心嘅裝潢就可以令你大開眼界。入面仲有各種復古服裝、糖果、遊戲、江戶風小物等等,喺呢絕對會尋寶尋到唔記得時間!

如果想順便嘆埋個下午茶,Decks入面都有Bills鬆餅,而且人潮會比東京市區少,所以基本上唔洗排太耐隊。

▶︎小編私心推薦:JOYPOLIS係由SEGA電子遊戲公司所開設嘅大型室內主題樂園,場內大多係體感型遊樂設施,有益智遊戲、節奏遊戲等各式各樣嘅遊樂器材。除此之外,LEGO LAND亦可以喺台場玩到,無論家庭、情侶定朋友出遊小編都超級推薦大家去玩返轉!
▶︎AQUA CITY 開放時間:11:00~21:00
▶︎Decks開放時間:11:00~21:00(商店/咖啡廳)
▶︎Diver City開放時間:10:00~21:00
▶︎交通:百合海鷗線『台場海濱公園』、臨海線由東京Teleport站行5分鐘

【台場海濱公園/お台場海浜公園】

圖片來源|Shutterstock

台場嘅沙灘就喺AQUA CITY正前方,亦都係一個人造沙灘,沙係喺伊豆運送過嚟。有好多東京嘅家庭都會喺假日揀嚟呢度放鬆、玩沙同玩風帆,又或者係同三五好友一齊嚟打沙灘排球。夏天邊吹住海風邊睇風景都係另一種旅行嘅樂趣,如果買完嘢或者行到攰,不妨沿住海灘散步、放鬆身心。

▶︎地址:東京都港區台場 1,Daiba,Minato-ku,Tokyo(座標:35.630752, 139.776077)
▶︎小編提醒:呢度嘅海邊係唔可以游水㗎,只可以做休閒嘅海灘活動。
▶︎交通:百合海鷗線『台場海濱公園』、臨海線由東京Teleport站行5分鐘。

【パレットタウン大観覧車】

圖片來源|Shutterstock

台場地標除咗彩虹大橋,就一定要數呢個大摩天輪!摩天輪座落喺Palette Town入面,坐上摩天輪之後可以眺望東京灣嘅景色。小編最推薦夜晚嚟睇夜景,據說如果你好彩嘅話,仲可以喺摩天倫上面睇到東京迪士尼嘅煙花~~

▶︎地址:日本〒135-0064 Tokyo, 江東区Aomi, 1 Chome−3−10(座標:35.626368, 139.782254)
▶︎開放時間:10:00~22:00
▶︎交通:百合海鷗線『青海站』
▶︎票價:一人900日圓,四人價格為3000日圓(比較抵)
▶︎官網:大観覧車

【維納斯堡Venus Fort】

圖片來源

最後小編要介紹會令身為購物狂嘅你買到失心瘋嘅Venus Fort!Venus Fort入面嘅設計仿造歐洲中古世紀嘅街道、廣場同噴水池,令人可以喺舒適嘅環境入面大出血。 Venus Fort總共分為三層,Venus  Family、Venus Grand、Venus Outlet,如果想買相對比較平嘅衫就可以去Venus Outlet,喺呢度真係唔怕你唔買,只怕你買到荷包都空埋~

▶︎小編慳錢小Tips:建議大家可以喺一月底嘅時候去Venus Outlet,除咗本身價錢就好平之外,一月仲會係日本嘅折扣季,會更易買到價廉物美嘅野。
▶︎地址:東京都江東区青海1-3-15(座標:35.624907, 139.779948)
▶︎交通:百合海鷗線『青海站』;如果由羽田機場前往,亦可以喺羽田機場14號乘車處搭直達維納斯城堡嘅機場巴士,只係需15分鐘。
▶︎營業時間:購物區11:00〜21:00,餐飲區11:00〜23:00
▶︎官網:維納斯堡Venus Fort

【大江戶溫泉物語】

圖片來源

相信好多人嚟台場除咗買嘢之外,仲有好大部份嘅原因係想嚟體驗大江戶溫泉物語!大江戶溫泉物語以重現江戶時代庶民生活為設計構想,呈現出江戶下町風情嘅湯屋、街坊小巷、傳統小食等等。除咗浸溫泉之外,仲可以著住日式浴衣喺充滿復古風味嘅空間走嚟走去,令人有種穿越時空返咗去江戶時代嘅感覺,一家大細嚟都好適合!

▶︎地址:江東區青海2-57大江戶溫泉物語別館(座標:35.615543, 139.777509)
▶︎營業時間:11:00~隔日09:00
▶︎唔想去到再排隊買飛,就要先喺網上面買定大江戶溫泉物語飛啦~
▶︎交通:
(1) 品川站免費接駁巴士
(2) 海鷗線「電信中心站」步行約2分鐘;臨海線「東京Teleport站」搭接駁巴士(免費)約7分鐘
(3) JR濱松町站前嘅濱松町巴士總站搭往「東京國際展覽中心」方向巴士,喺「電信中心站前」落車,步行2分鐘
▶︎官網:大江戶溫泉物語

#台場推薦票券、折扣

【百合海鷗一日券】

Credit | Su

如果你係揀搭百合海鷗線去台場,咁小編就非常推薦呢張一日券!佢可以喺一日內(非24小時)無限次乘搭百合海鷗線~而台場景點其實大多都圍繞喺百合海鷗線嘅站附近,所以可以多多利用百合海鷗線去每個景點,慳時間又慳力!只要你會搭百合海鷗線3-4次就會回本,咁就可以考慮買呢張一日券啦~

▶︎只要係喺百合海鷗線各站嘅自動售票機都可以買到一日券,如果要一次過買好多張亦可以去新橋站或者豐洲站嘅站務員室買~

【Diver City Tokyo優惠與折扣】

▶︎Diver City Tokyo購物中心持交通銀行信用卡消費滿指定金額可享購物券(~2018/06/30止)
▶︎詳情:「三井激賞滿載購物樂」

【台場AQUA CITY優惠與折扣】

▶︎去部份店鋪消費之前,出示AQUA CITY ODAIBA”層&美食導遊”小冊子可享優惠。
▶︎詳情:AQUA CITY官網
另外台場嘅百貨公司有時候會一齊舉辦夏季大折扣,所以如果你係夏天去,亦都可以試下上網Search『台場 夏季折扣』,睇下有冇撞啱舉辦日期。亦都建議大家出發前上呢啲百貨公司嘅官網查下有冇最新折扣優惠。
▶︎AQUA CITY官網
▶︎Decks官網
▶︎Diver City官網

#台場一日遊路線

圖片來源|Shutterstock

如果你係個好鐘意行街嘅人,咁花一整日嘅時間喺台場就啱啦!如果唔係你只會後悔冇安排多啲時間喺度,因為會發現完全行唔夠、玩唔夠啊~~~

▶︎建議路線:海鷗線『台場海濱公園or台場站』(Decks、AQUA CITY、富士電視台、Diver City、海濱公園)→海鷗線『電信中心站』(大江戶溫泉物語)→ 青海站(Venus Fort行街、大観覧車坐摩天輪)

可以先喺台場海濱公園或者台場站睇下富士電視台、去百貨公司行一轉買啲野,之後再去大江戶溫泉物語浸溫泉、著住浴衣放鬆下,體驗下江戶時代風情。休息、補充完體力再繼續去Venus Fort大買特買,行完街亦可以去大観覧車坐摩天輪睇夜景,如果唔想洗錢嘅話,你亦可以去台場海濱公園海灘欣賞夜晚嘅彩虹大橋。

相反,如果你想行隨性路線嘅話,咁就買張百合海鷗線一日券,搭到邊就玩到邊!

#番外:唔想行咁耐?台場半日遊路線

圖片來源|Fotolia

如果一提到行街你就興致缺缺,咁小編建議你安排半日畀台場就夠喇!你可以先去大江戶溫泉體驗著浴衣、浸下溫泉。之後去海濱公園欣賞彩虹大橋、影相打卡,最後再去富士電視台參觀。或者你都可以調返轉,先去海濱公園同富士電視台,再去大江戶溫泉體驗下日本祭典嘅氛圍同各種泉池!

咁剩低半日要去邊?小編推薦你去淺草寺,因為搭水上巴士往返淺草寺同台場非常方便,所以兩個景點可以安排喺一齊。如果大家咁啱喺聖誕節期間去日本嘅話,汐留都非常適合排入行程,因為每年聖誕節期間汐留都會有勁靚嘅燈飾佈置~另外,築地市場亦都就嚟搬去豐洲,如果之後搬遷完成,你亦可以考慮將豐洲加入半日遊行程入面。

以上就係台場攻略喇!希望幫到之後有計劃要去台場玩嘅你啦,祝大家都可以買到夠、玩得開心!

出發去台場,千祈唔好錯過:
▶︎新玩法!咁樣先睇到台場最靚夜景
▶︎大人細路都咁啱玩,JOYPOLIS到底有咩魅力?
▶︎家庭出遊最適合!點訂LEGO LAND飛?

更多東京攻略:
▶︎【機場交通】【東京機場大解密】成田、羽田機場交通攻略
▶︎【市區交通】【日本】東京交通總攻略,6點教你輕鬆遊東京
▶︎【東京攝影】【東京絕美富士】富士山攝影教學
▶︎【東京行程】【東京近郊】話你知市區外5大玩法
▶︎【東京美食】【餓底日誌】東京尋找拉麵之旅
▶︎【東京必去】【日本私藏大公開】東京五大文青地

原文:【東京台場】交通景點總攻略

▲認識KKday▲
想挑選心水行程又怕浪費時間比較?KKday 作為亞洲最大旅遊體驗平台,網絡橫跨全球 54 個國家、174 個城市,為您搜羅超過 6,000 種特色行程體驗。只需安坐家中,就能訂購世界各地具品質保證、價格實惠的旅遊產品,助你輕鬆自主行程,創造獨一無二的旅遊體驗。

▲前往 KKday 網站,訂購心水行程!
▲訂閱 KKday電子報,獲取更多旅遊優惠!

關注KKday社交平台動向:
Facebook ▲Instagram ▲YouTube ▲旅友討論區

發表於2017.9.01
留言(0)
博客名稱 :
KKday
網誌名稱:
跟著 KKday 去旅行
使用天數:724
年齡:1
電郵:hk@kkday.com
按月份瀏覽
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
    2016
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 寵物日誌
  • 攝影寫真
  • 星座算命
  • 戀愛心情
  • 文化政經
  • 其他
  • 財經生活
  • 台灣館
自行分類