17
05.2018

小朋友的TROUBLE馴服燥底媽

親子育兒(日常)  

對住小朋友有時真係又愛又恨,好鐘意佢地咁純真咁可愛,但佢地麻煩起上黎真係好得人驚!!! 好多人話TROUBLE 2 好煩因為2歲小朋友開始有主見,自我意識強,識得SAY NO,但又未識守規則,上一秒仲好可愛,下一秒可能已經發脾氣狂叫,總之長期挑戰父母底線。

我本身個人都屬於燥底,屋企入面負責鬧人的大奸角一開始就已經由我來擔當,小周董2歲開始識得曳的時候,我就開始使用60分貝聲量鬧人,喝止佢D大大小小曳曳行為

2歲的時候,佢曳但一聽到我高分貝的鬧人聲都會即刻停止,然後喊住低頭乖乖聽我教訓,再同我SAY SORRY,所以小周董的TROUBLE 2其實都唔算好麻煩。

 

TROUBLE 2順利渡過後,話咁快來個TROUBLE 3,觸發點係工人姐姐要離職,小周董忽然間性情大變,每日哭鬧,食飯喊沖涼喊訓覺喊,返學好乖但回家變身百厭仔。

小周董的TROUBLE 3最令人頭痕係鐘意出手打人,一有唔開心就動手拍打人,有時什至對住爸爸都出手,爸爸開始同我企同一陣線,一齊做對嚴父母,每次小周董做出任何無禮貌行為,我同爸爸會一致對佢嚴厲教訓,採取鬧的方法,對TROUBLE 3的小周董都幾有效,至少改善左打人習慣,亦少左無理發脾氣,但細聲鬧係唔聽,我要燥底媽上身,鬧佢的聲量由70分貝...慢慢去到80...90....什至100先WORK =.='''

好境不常TROUBLE 3隱定下來,最近竟然來個恐佈TROUBLE 4,可能因為我有左細佬B的關係,小周董的TROUBLE 4情緒可以話係大起大落,其實喺我大肚期間小周董日日暖男上身,日日話要照顧我,仲成日對住個肚傾計同唱歌仔,不知幾SWEET。

但細佬B出左世後,佢好似感受到有一個人出來,原來唔係可以即時同佢一齊玩,而係分薄左大家對佢的關注,恐佈的TROUBLE 4就開始來了。

原本可以自己食飯自己訓覺,而家通通做唔到,訓覺一定要搵人陪先訓到,仲要拖到實一實先肯訓。

牛高馬大有成45磅重的小周董,而家行幾步就話攰要爸爸抱, 真係重到呢 =.=

細佬B出世後其實我同爸爸擔心佢呷醋,已經用大部份時間來陪佢周圍吃渴玩樂,細佬全部交比工人姐姐照顧,可惜佢依然長期鬧脾氣、攪破壞、叫佢做一佢做二,越係唔比佢越要做,我地鬧佢,佢就發惡掉野,露出一個委屈模樣...然後大喊!!!

我同爸爸鬧佢的聲音分貝由80....100........再去到爆表120,點鬧都無改善,有時鬧完佢,佢明顯條氣唔順,就擺出一個串樣(唔順氣),黑人憎情況令我同爸爸又嬲又傷心。

點鬧都無用,我真係覺得好無奈,同埋好沮喪。日鬧夜鬧令到我呢個燥底媽終於壓力爆標,有一日當小周董發脾氣,我再無力氣鬧,忽然忍唔住喺佢面前大喊左一場,我個刻覺得我生細佬出黎為左你將來有伴,但呢個決定會唔會係錯? 因為妒忌令到你由暖男變左燥男 ~>.<~

我攬住佢大喊同佢講﹕可唔可以比返以前的乖寶寶我? 我想要返以前有禮貌的好寶寶。小周董見到我喊,明顯呆左成個人軟化左,扁晒咀眼濕濕攬住我,之後仲應承我會乖,當天全日都好有禮貌, 無發過脾氣!!! 

忽然我都來個自我發省,原來有時對小朋友唔可以一成不變,以前佢受硬唔受軟,唔代表日後用鬧呢個方法可以用一世。我同爸爸要多D溝通同互相提點,將原本想鬧佢的說話變成讚佢,佢態度唔好、擺出一個串樣,我地會笑住同佢玩住講: 呢個樣唔係咁靚,我地掃走佢,比D靚牙仔我睇下,笑樣真係NICE好多喎。

盡量將佢d曳行為淡化,減少鬧佢變成多D讚賞,有時見到佢真係太曳開始失控時,即時攬住佢,原來一個擁抱可以令到大家氣沖沖的情緒降溫。另外比佢多d接觸細佬,就算只係每日15分鐘都好,都盡量比佢同細佬傾下計、玩下,同細佬有多d交流。

佢一D頑皮的行為如果唔會有危險,我地都盡量唔再阻止比佢自己試,例如有次佢玩貼紙玩到周圍貼,我唔再鬧佢,反而同佢一齊玩,一齊痴到成面都係,大家關係好左FRIEND左,講乜佢都容易接受D,一星期後佢想再玩,唔再係自己拎出黎亂貼,竟然係好有禮地問我可唔可以同佢一齊再玩貼紙。

雖然我天生燥底,但媽媽為左想佢地2兄相親相愛,希望哥哥做一個有禮乖寶寶,因為佢...我的起心肝變得溫柔....由燥底媽變身<忍>者。

小朋友的TROUBLE真係年年都有,雖然有時真係忍得好辛苦,每次佢曳曳的時候,我都好想再次開動我120分貝的聲量去鬧佢....但一唸起如果今次我鬧佢,佢第日又會用返呢D說話駁咀,我個樣越兇恨,佢對我就越無禮,所以我快速收儉左自己燥底性格,將個<忍>字刻左喺額頭,雖然有時都有忍唔住既時候,但至少屋企唔會每一天都家嘈屋閉,連我老公都話從來無見過我,好嬲但忍住唔鬧人嗰個樣......哈哈


各位燥底媽......加油啊!! ^^

 www.facebook.com/1437ritaandhim

www.facebook.com/1437ritaandhim

歡迎大家給予意見,如有任何邀稿或產品試用,請電郵聯絡: ppqq1437@yahoo.com.hk,我的其他15個BLOG分享包括: InstagramBlogspotBeautyExchangeOh爸媽、24partent專家博客Weshareshe.comtheZtyleELLE.comstyle-tips U BlogEsdlife靚太clubQOOZAMybb.com,  ClassesWePlay星級bloggerMamibuy駐站部落客OpenRice(級別4)

發表於2018.5.17
留言(0)
博客名稱 :
1437rita
網誌名稱:
RitA Himhim BloG
使用天數:1,756
性別:
按月份瀏覽
    2018
  • 一月
  • 二月
  • 三月
  • 四月
  • 五月
  • 六月
  • 七月
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 攝影寫真
  • 戀愛心情
自行分類
最新留言